政情：港台不符成本效益 議員促裁員慳水慳力

委員會主席何君堯日前喺社交平台拍片，大談港台人手編制嘅問題，佢話港台一共有752名非首長級人員，真正編制有436名，編外職位多達800幾人，232人屬於製作事務部，電台同電視部分別有97同263名員工，而新聞部就有96人。何君堯尋日接受本報查詢時話，港台非首長級人員有七成人嘅月薪介乎5萬至7萬元，形成港台冗員過多且薪水太高嘅現象，由於薪酬調整係按照公務員機制而定，因此減港台員工薪水並唔可行，但佢認為仍然有壓縮同刪減人手嘅空間。

斥開支與收視率不成正比

何君堯又話，雖然港台舊年開支接近10億，比前兩年減少幾千萬，但係慳得幾多就得幾多，批評開支同收視率嘅衡工量值唔成正比，所以佢會喺下周一嘅會議上關注報告第4章嘅衡量及評估服務表現，仲有第6章財務管理，希望官員能夠解答問題。

何君堯認為，港台作為政府部門同公營廣播機構，理應協助政府推動政策解說，又再次建議港台新聞部同政府新聞處新聞組合併，由政府新聞處處長監督港台同廣播處長，並撥歸民政事務局主管，呢個建議起碼可以節省6億元同減少人手。

個人意見節目為黑暴助攻

一直關注港台問題嘅議員葛珮帆（EQ）話，港台編輯管理一向「無王管」，近日亦有兩個節目被處長下令抽起，反映問題嚴重，佢不點名批評有部分個人意見節目為「黑暴」助攻，會喺會上跟進。至於會否要求港台高層減薪？EQ就話建議值得探討，相信有議員會提出。

當日會議有3個議程要討論，預計3個鐘頭就會完會，EQ話報告每一部分都要詳細討論，肯定唔夠時間傾，佢會再要求何君堯加開特別會議，集中討論港台部分。

李百全抽起節目 員工不滿

另外，新官上任嘅李百全近日亦有所動作，繼抽起《香港故事》訪問本地樂隊LMF等集數後，原定明晚7點半播出第4集《香港故事》，亦突然遭抽起，改為播放由港台教育部前年7月製作嘅舊節目《香港故事——鄉人．情味西貢潮人》。突然抽起多個節目令好多員工不滿，尋日就召開員工大會要求約見李百全，但李則以事忙為由拒絕出席。