中環出更：提醒風險難測 顏吳餘英：海外置業須實地視察
鈔票氾濫，磚頭有價。講到投資保值，不動產始終都係港人嘅最愛，然而香港樓市實在過於離地，以致有本地投資者覬覦海外物業，更有人不惜高價收購異邦樓房。不過作為海外買家，房產遠在千里之外，難免要承受一定風險。理工大學顧問委員會主席顏吳餘英，就認為投資物業牽涉龐大金額，若果欠缺實地視察嘅機會，「隔山買牛」真係制唔過。
因應疫情全球肆虐，各地交通中斷人員往來受阻，海外物業市場近來雖興起網上放盤，但顏太話自己一定唔會用咁嘅形式去購買物業，話付出真金白銀之前，必須要先了解發展商嘅往績、信譽同口碑，亦要親身去睇吓物業嘅用料，以及其附近嘅環境，絕對唔可以喺網上睇資料就算，話就算喺網上買件衫都可能會出問題，更何況係買層樓呢？
保良局副主席陳正欣，以及太子珠寶鐘錶集團主席鄧鉅明，兩人皆異口同聲咁話，暫時唔會喺外地置業。正所謂財不入急門，縱使資金要謀求出路，陳正欣都認為呢段時間宜謀定而後動，亦唔好貪平，況且外國樓市比較平穩，冇香港波幅上落咁大，如非急需可以睇定少少，陳正欣又指購買物業，並非單憑喺網上睇資料咁簡單，需實地視察各方面配套是否完善，就算喺香港置業，上述嘅原則亦都適用。
鄧鉅明寧做「守財奴」
港人透過網上投資海外物業，結果被騙去訂金嘅消息，鄧鉅明都略有所聞，佢話喺市況不明社會不穩嘅環境下，暫時唔考慮海外置業，加上目前難以到當地視察，單憑發展商提供嘅資料，其實未必可靠。鄧鉅明覺得呢一兩年投資氣氛唔係咁樂觀，最好係將啲錢放喺銀行，就算低息都冇問題，實行要做一個「守財奴」咁話。
卓妮