中環出更:拒公布漏發檢測訊息承辦商 梁美芬斥食衞局包庇

食物及衞生局嘅電話短訊通知系統喺舊年11月底出現技術問題,當時包括李偲嫣夫婦在內約800名接受檢測嘅市民未能收到載有其陰性檢測結果嘅電話短訊,局方冇透露涉事外判承辦商係邊間。不過最近有份承辦社區檢測中心新冠病毒檢測嘅金域檢驗(香港)有限公司犯錯,食衞局又公布喎。議員梁美芬(Priscilla)就喺社交平台貼文斥食衞局雙重標準,要求局方立即解釋清楚!

包括李偲嫣夫婦檢測結果

話說舊年12月有800名市民收唔到檢測結果,李偲嫣其後病逝,遺體更驗出新冠肺炎病毒。Priscilla兩度去信陳肇始要求提供詳情,但仍未收到回覆,就連涉事嘅外判承辦商係邊間都未知。反觀近日金域係化驗室有環境污染,令兩萬個檢測未能及時完成;再有6,000個檢測結果延誤發出,食衞局同醫管局就主動公布喎。

Priscilla質疑食衞局雙重標準,反問點解金域犯錯局方就願意開誠布公,但漏發800個訊息嘅承辦商就得到庇護呢?佢認為局方拖咗兩個幾月,必須立即解釋清楚,向全港市民同逝者家屬交代番件事呀!

卓妮

第一手消息請下載on.cc東網iPhone/iPad/Android/Windows Phone Apps