政情：潘國山嫌勞處更新慢 入4搵工群組做專家

潘國山就話，自己最初加入一個「炒散團」，每日都將入面嘅招聘消息向街坊轉發，方便佢哋掌握最新嘅搵工資訊，慢慢覺得呢個方法幾有用，所以依家已經入咗4個搵工群組咁多添！佢又話，雖然勞工處都有唔少搵工資訊，但就更新得唔夠快，好多人都反映話搵唔到工喎。

作為兼職「搵工專家」，潘就分享自己嘅觀察，話呢啲搵工群組喺第4波疫情之後湧現，入面都會有聘請全職僱員，但就主要以兼職或短期職位為主。佢又形容依家連「炒散團」都開始轉型，由以往集中於酒店工作，轉為以飲食業同「三行」為主。不過，佢就話感到新年之後更加難搵工，即使有都只係一啲短期工，估計唔少老闆都選擇裁員或結業，加上好多人願意做短期工，希望可以捱住先。