笑看天下:豈能磨刀霍霍向中產

新一份財政預算案公布後,坊間劣評如潮!政府預先「呻窮」叫大家要「睇餸食飯」,除了對基層「減甜」,更無所不用其極「撲水」,28年來首加股票印花稅,導致周三股市大跌!而財經事務及庫務局局長許正宇更斬釘截鐵表明冇「Plan B」,重申政府不會改變決定!可見政府一心撲水,只會硬起來,不會議而不決軟下來!

本港2020至2021財政年度赤字破紀錄高達2,576億元,未來5年好大機會入不敷支再見紅,政府開源節流大費周章,皆因香港乃開放型經濟體,稅基向來狹窄,政府倚重印花稅和土地收益至為明顯;如今政府抗疫無能,致使經濟一池死水,喺民生多艱下,政府卻心中無民,唔係用盡善法為民紓困,諗吓如何激活經濟以暢旺市道,反而推一貧如洗嘅失業市民去借錢,更磨刀霍霍向中產!

財爺曾經考慮上調薪俸稅和利得稅稅率,粗略估計若稅率調高一個百分點,庫房將多收100億元。之不過,佢形容「行出街就知道社會幾痛,知道經濟有幾差」,是以認為暫時未係時候,來年須審視形勢再決定,又唔排除開徵資產增值稅嘅可能。要言之,經濟略有轉機,中產未來得及舒一口氣,可能又要為加稅揸頸就命!

事實上,香港啲中產向來只係表面風光,政府好景時,「派糖」佢哋最少,公屋冇資格申請,居屋又因資產「尷尬」無條件,焗住租貴樓,有幸有「父幹」幫交首期嘅,供樓都供到索氣!依家財赤,無能政府竟第一時間諗起向佢哋開刀,仲唔係涼薄冷血!正如有學者話齋,政府喺經濟差時應救濟市民,若再設新稅種或加稅,市民會質疑到底係攞景定贈興?政府開源無方,咪要節流囉!一眾庸官抗疫無能,首先削薪一半以略息民憤!其次咪做大花筒,煞停「明日大嶼」,勿亂泵水救啲只見黑洞嘅企業如國泰,咁已可穩住大局!