政情：內會通過改內務守則 下周一生效
因應議會近年經常出現拉布同衝突，建制派醞釀修改立法會《議事規則》同埋《內務守則》，喺尋日嘅立法會內務委員會上，通過修訂《內務守則》同埋《議事規則》，其中同《內務守則》相關嘅修訂將於下周一起生效，當中包括議員唔可以再喺事務委員會上喺未經預告下臨時提出動議。
議事規則委員會早前向內委會提交合共8項嘅修訂建議，《內務守則》佔咗3項，另外兩項為根據《基本法》第73條第（5）項及第（10）項和《立法會（權力及特權）條例》動議嘅議員議案嘅處理次序、同埋對《內務守則》提出嘅擬議修訂。同《議事規則》相關就佔5項，包括縮短議員發言時間、引入處罰機制等，將會由內務委員會主席喺下月24日立法會大會上提出動議處理。
葉劉指議會秩序每況愈下
對於建議修例，尋日建制派議員喺會上表示支持，議員梁美芬唔認為係加辣，議員葉劉淑儀仲覺得立法會秩序每況愈下，又衝擊主席台、又掉水杯同香蕉，有需要改善。不過建規界議員謝偉銓認為縮短議員發言時間，由15分鐘減至5分鐘實在太短。