政情：疑用區會紀念品做宣傳 陳樹英捱批
泛民主派主導區議會後，不時被質疑公器私用。有團體舉報屯門區議會主席陳樹英其身不正，利用區議會撥款嘅紀念品，作個人宣傳，要求區議會發出嚴厲警告。
團體舉報 促發嚴厲警告
「屯門議會監察」尋日向屯門民政事務專員馮雅慧遞交請願信，舉報陳樹英喺區議會撥款製作嘅紀念品，附上陳同黨友嘅姓名、頭像及所屬政黨標誌嘅資料，認為陳利用公帑作宣傳，係公器私用。團體要求區議會向陳發出嚴厲警告、停止再向陳分發區議會撥款嘅物品，以及要求佢支付有關紀念品嘅製作費。
當區區議會財委會尋日開會，秘書處提交文件，提到陳涉嫌違反撥款準則，唔單止令區議會信譽受損，更加危及區議會工作。陳透過電郵向秘書處「解畫」，話同事開街站派物品時，佢通常都唔在場，所以唔知有冇一併派發涉及佢嘅宣傳資料喎。但就話如果引起誤會，願意為此致歉。陳回應本報查詢時，就拉埋對家落水，話當區建制派區議員賴嘉汶，同樣有利用區議會紀念品作宣傳咁話。