中環出更：監察港台改革議員邀商經局討論報告
劣迹斑斑嘅香港電台多次被批立場偏頗，近年更屢次被裁定違反廣播機構節目守則。檢討港台專責小組上周五（19日）發表管治及管理檢討報告，批評港台欠缺清晰嘅編輯問責制度。議員葛珮帆（EQ）同陳恒鑌尋日去信立法會資訊科技及廣播事務委員會主席何君堯，要求委員會加開特別會議，同時邀請商務及經濟發展局局長邱騰華，同候任廣播處處長李百全出席會議，就報告展開討論。
兩人喺信件中提到，為咗確保港台會認真審視報告所列出嘅問題，並就報告訂立優先改革項目、行動計劃同工作時間表，全面落實報告建議，致力為市民提供優質嘅公共廣播服務，因此要求委員會加開特別會議討論。
本月初曾去信要求加開會議
其實喺今個月初，EQ都講過曾去信當局要求盡快另開會議討論港台嘅問題，不過會議都未開得成，又有另一則投訴，就係關於港台電視節目《鏗鏘集》喺舊年12月14日播出有關屯門青山灣入境事務中心嘅節目，有紀律部隊工會批評內容涉失實同埋偏頗，令有關部門好憤怒。
何君堯當時就話，本身係打算喺今年4月份討論港台嘅事，不過期間就出現更多有關港台嘅投訴，認為有必要提前喺下個月討論。卓妮