政情:苦等10載 田北辰終睹扶手電梯落成

十年落成一基建,但係人生有幾多個十年呢?議員田北辰(田二少)話幾經波折,終於成功爭取一條扶手電梯。田二少尋日上載片段到社交平台,話自己喺10年前仲係區議員嘅時候,已經開始喺區議會爭取喺荃灣港鐵站A4出口興建扶手電梯,期間不斷游說路政署同港鐵,對扶手電梯最終落成都有啲感觸喎。

田二少話,扶手電梯落成啟用,可以方便區內市民,到A4出口轉乘荃灣線就毋須再行44級樓梯。佢又好興奮咁話呢世人未試過排隊搭一條全新嘅扶手電梯,可以做到一啲惠民嘅措施,感覺非常開心。

幾經波折 工程險胎死腹中

之不過,原來扶手電梯工程差啲胎死腹中,話說當年嘅構思,係打算起兩條可供上落嘅扶手電梯,不過要同港鐵借地,加上工程耗資幾千萬,超過咗區議會能夠批出嘅金額限制,田二少於是再同路政署商談,建造一條單上嘅扶手電梯就唔需要問港鐵借地,開支只係幾百萬,呢次嘅游說亦令田二少上左寶貴嘅一課。

第一手消息請下載on.cc東網iPhone/iPad/Android/Windows Phone Apps