政情：坐監生活規律 胡志偉三高受控
民主黨前主席胡志偉涉一再違法，早前因涉違反《港區國安法》被拘捕後，遭揭發冇遵守法庭指示交出旅遊證件，被指違反保釋條件，將佢還押懲教署看管。被拘押一段時間，前議員邵家臻尋日就喺Facebook貼文話收到胡來信，胡提到自己喺獄中生活有規律，三高受控，健康大有改善咁話。
早睡早起 控制飲食
胡志偉喺庚子年最後一日，即係今個月11日寫呢封信。信中講到，話邵家臻之前出獄時健康大有改善，佢自己都因為規律作息，控制飲食，早睡早起，就連三高問題喺生活規律同藥物協助下，似乎都被控制喺安全水平。
照咁睇，佢嘅獄中生活都似乎過得唔錯，身體狀況仲比以前好咗，既然咁好，都好似可以繼續留多一段時間？所以話，做咩都要有規律，唔好亂咁嚟，唔係就會好大件事，後果不堪設想。