政情：滅鼠不力 遺爛攤子 劉利群升官匪夷所思

尋日港府公布劉利群將會喺今日起，接替容偉雄出任食衞局常秘，而容偉雄就將會出任政務主任招聘委員會主席，並喺今年5月展開退休前休假。根據公務員事務局嘅首長級薪級表，依家劉利群屬D6（首長級第6級）級別，嚟緊就升上D8（首長級第8級）級別，即係政務官最高級，薪金仲由273,000港元升到303,950港元，加咗成3萬蚊人工。

政策朝令夕改 玩殘年宵花農

劉利群任內嘅表現係點？真係罄竹難書。佢喺食環署署長任內瓣瓣都唔掂，滅蚊、滅鼠不力，被鬧爆用傳統方法滅鼠唔掂，之後又話會用新科技，點知新科技仲差，就連用膠桶就捉到老鼠呢啲民間智慧，真係高招過劉利群多多聲喇！

正如早排搞年宵花市，又係搞到一鑊粥。先話為免人群聚集，話停花市，搞到啲花農失晒預算，跟住停停吓又突然話開番，畀花農鬧爆仲死撐安排合理，朝令夕改，真係玩殘啲花農。劉利群咁嘅表現竟然都有得升職，唔通官場鬧人才荒到咁？

容偉雄當年亦甩轆後仍升職

講開又講，容偉雄當年做商務及經濟發展局常任秘書長（工商及旅遊）時都係轆照甩、職照升。當年容偉雄有份處理版權修訂條例草案，最終條例草案雖然被迫「作罷」，但佢仍有得升正，同樣都係D8級別。

做得差仍然有得升職，唔少議員都覺得好驚訝。議員柯創盛批評食環署過去喺改善市容方面嘅工作都有好大嘅改善空間，而且過往都未有積極主動同持份者溝通，相信市民對劉利群咁樣都升到職會有好大嘅疑問，仲鬧爆劉依家留低爛攤子，只會令接任人覺得好不知所措。佢仲勸勉劉升職後要聽意見。

另一名議員陳恒鑌亦批評劉利群嘅表現，唔止少同議員溝通，反映完嘅意見都冇做得好足，對於劉升職感到好驚訝，仲話估唔到可以升到咁高級。佢希望劉利群未來可以做好制訂政策嘅工作，同埋要了解社會需要變革，唔應該一成不變喎。