中環出更：胡椒蟹變辣椒炒辣椒 鄭承峰做過地獄廚神
香港人出咗名嘴刁，早前各大小食肆因應禁聚令而冇咗晚巿堂食，一眾老饕就惟有捲起衣袖親自下廚，而近來就多咗人透過網上睇片自學烹飪，結果產生唔少「地獄廚神」。香港灣仔區各界協會主席鄭承峰講起下廚經驗，原來都曾經「地獄」過，仲食到班朋友皺晒眉頭添！
鄭承峰回想9年前結束王老五生涯，下廚經驗亦由此開啟。佢話當初都係靠網上睇片同埋睇烹飪書學煮飯，仲試過一口氣睇晒9本同一系列嘅飲食書，當中詳細分析烹調一道菜式，其食材嘅先後次序、火候大細皆有其道理。佢話喜歡研究煮食嘅章法，每逢出街用膳品嘗美食，腦海中就會想像廚師嘅烹調技巧。雖然醉心廚藝，但佢都經歷過「地獄」嘅階段，佢話當年初次炮製胡椒蟹，煮食不但毫無章法，兼且又亂咁落調味，結果落鑊炒完之後啲蟹肉散晒，朋友試食之後仲問佢係咪煮「辣椒炒辣椒」，依家諗番都覺得好好笑。
其實當日鄭承峰係代表「香港灣仔區各界協會」，同「灣仔建設連線」嘅成員聯手向市民推介灣仔區嘅特色食肆，期望藉此提振區內嘅飲食市道，兩位區議員李碧儀同林偉文亦在場。
李碧儀盡得媽咪真傳
李碧儀話喺孩童時代，媽咪就會帶佢周圍食嘢，而灣仔某糖水舖嘅生炒糯米飯就最令佢回味，就算到依家都仲有幫襯，但嗰間糖水舖嘅營業時間好飄忽，可能要撞啱老闆心情好，先有機會得嘗美味。其實佢自小就跟媽咪入廚房幫手執頭執尾，佢話媽咪廚藝出色，亦因為咁自己「唔覺意」得到媽咪嘅真傳。林偉文就話買餸比較叻啲，因為婚後住得偏遠，每日喺市區收工後會買餸返屋企，交畀掌管廚房嘅太太負責。佢話以前買餸都試遇過「呃秤」嘅不快經歷。佢仲分享買餸嘅心得，就係揀女士睇檔嘅檔口幫襯，一埋去就叫聲靚女先，阿姐開心晒又點會捨得呃你喎。
卓妮