前年反修例風波期間，示威者先後佔據多間大學，並成功癱瘓校園附近主要嘅交通幹道。政府當時決定撤回香港大學及香港中文大學共兩項醫療教學設施項目撥款建議，其後重新交上立法會審議。喺尋日舉行嘅財務委員會會議上，多名議員繼續關注中大嘅保安問題，又擔心未來會再度成為「暴動基地」，會令未來進駐嘅國家級實驗室設施受到破壞，要求加強保安及教導學生守法。
議員周浩鼎指，有國家級實驗室計劃進駐中大嘅擬建大樓內，形容香港同中大獲得國家信任係一件好事，故不能辜負內地信任，擔心中大未來會再次成為「暴動基地」，會令相關設施受到破壞。另一議員葛珮帆就話，擬建大樓中好多實驗室設施均屬香港所需，但問題係位置設於中大，唔少市民擔心該大樓會再次淪為兵工廠、武器庫，要求校方交代如何確保有關設施不會被破壞。佢又提到許多香港嘅大學生滿嘴粗言，關注中大如何教導學生守法意識，以及最新推出嘅國家安全教育。
中大管理層回應時形容前年發生嘅事係慘痛教訓，強調已吸取了好多經驗，現時已聘請保安顧問，並喺校園四周、敏感地點及實驗室，以及「二號橋」加強保安；又指與執法機構有緊密聯繫，當有違法事件發生時會第一時間反應，但重申中大嘅地理限制，加上要符合地契要求，故在保安上有難度。中大又透露，校園喺反修例事件期間被破壞，校方用咗5千萬港元進行維修，當中七成涉及校巴，另外三成則有關實驗室等其他地方。
至於國家安全教育方面，中大指會配合大學教育資助委員會及教育局嘅要求，又提到已成立由7人組成嘅多元共融部門，加強學生嘅多元共融教育。