政情:撞完麒麟又撞牛 葉劉全年都咁愁

踏入牛年,香港術數家協會術數師楊子東預測本港多位政界人物嘅運程都麻麻,當中有幾位議員都唔好得去邊,被批算嚟緊一年會好唔掂,包括議員葉劉淑儀(葉劉)、陳克勤(克勤)及陳恒鑌(Ben)等人,其中葉劉更係咁多位之中最差,全年可以話唔合格,得四十五分咋!

楊師傅話,葉劉忌土忌金,但今年辛丑年,辛代表金、丑代表土,係大不吉。首先上半年會忐忑不安,秋天又將會有好多事發生,相當不利,九月更係最差,講咩都開口夾着脷,做咩都唔成功咁話,至十月十一月就因為行唔到水木運,繼而平平無奇,十二月更係當黑到極!所以全年都唔掂,冇運行咁話。

其實葉劉被批「運滯」已非首次,六年前佢喺車公廟被麒麟撞飛,當時就有堪輿學家指出,一般人若拜神時仆親即「全年黑過鬼」,遭麒麟撞意味佢會遇到好多阻滯同麻煩,宜小心說話及是非口舌,應低調行事、勿鋒芒太露。不過作為基督徒嘅葉劉就回應話自己唔信邪。依家睇番轉頭,當時堪輿學嘅批算有幾靈驗,實屬見仁見智,不過葉劉畀一眾「花生友」瘋狂抽水,似乎就中咗「是非口舌」呢個預測啦。

陳克勤陳恒鑌料冇運行

另一議員陳克勤同樣忌土忌金,即係同葉劉同命運呀,注定冇運行,師傅話佢今年平淡得嚟會吃虧,仲話過勞會病,去到年尾仲會有唔少麻煩事,總之全年都唔好喎,仲要冇咩政績交代,完全唔合格!

至於佢黨友陳恒鑌都一樣,反覆得嚟唔係好好運,師傅仲預計Ben農曆七月會犯小人,講多錯多,如果處理唔好,一個唔小心就會犯官非,去到年尾則大不利,水旺木漂,自己揸唔定主意,同時壓力又好大,愈忙愈做錯嘢,壓力大就更加容易做錯。

勸喻鄧家彪唔好買股票

此外,師傅仲特別幫工聯會前立法會議員鄧家彪批算下,話佢一定會有事,做嘢唔順利之餘,健康亦會出現問題,仲提醒話嚟緊會不停出現人事鬥爭,甚至負面消息,好易開口夾着脷。唔單止係咁,仲可能會輸錢,勸喻佢唔好炒股票,會咩都冇晒!聽落真係好大件事,大家要小心為妙啦,相信處理得好就應該相安無事,處理得唔好就真係神仙都救唔到喇!

第一手消息請下載on.cc東網iPhone/iPad/Android/Windows Phone Apps