政情:李卓人:做好坐監準備 陳克勤斥咎由自取

前年8‧18反修例「流水式集會」未經批准集結案開審,其中一名被告職工盟秘書長李卓人否認控罪。佢仲拍片話做好入獄嘅心理準備,又話同情手足無法同家人團聚。議員陳克勤(克勤)鬧李卓人博同情,又反諷呢個局面係由李一手造成,唔少年輕人更被佢哋氹去犯法,叫佢慳啲,唔好再抽水喇!

李同「美國佬」行好埋攞威

職工盟嘅社交平台上載咗李卓人嘅訪問,李講到已經做好心理預備要坐監,但身體上完全無預備,唔會話沖凍水涼或者食差啲先,都係照常生活喎。適逢農曆新年,佢話都係同家人團聚,以前會諗團聚冇乜特別,但今年心情有啲唔同,因為對好多獄中嘅手足而言,團聚簡直就係奢侈品。當佢擁有自由時,都會心痛佢哋失去自由喎。

對於李卓人呢番說話,克勤直斥李一直同「美國佬」行得好埋「攞威」,涉嫌犯法而被捕係咎由自取、自食其果。而且李有份促使後生仔犯法被捕,慘過佢嘅大有人在,依家竟然仲抽水,叫佢慳啲呀!

第一手消息請下載on.cc東網iPhone/iPad/Android/Windows Phone Apps

卓妮