政情:基金審批離地繁複 漁民乾塘斥支援不足

漁業雖然係香港嘅早期行業,但已日漸式微,而政府就喺2014年成立漁業持續發展基金,向漁業界提供財政支援,幫助佢哋開展可持續發展計劃。立法會食物安全及環境衞生事務委員會尋日舉行會議,會上有議員批評基金申請同審批嘅過程繁複,超過三成半申請唔獲批;又質疑當局審批太離地,半數獲批申請嚟自學術機構,質疑基金並唔能夠真正幫助到漁民。

半數獲批申請來自學術機構

議員葛珮帆就話項目自推出以來,截至舊年12月,44宗申請入面多達16宗唔獲批,覺得申請成功率低;又批評基金審批過程繁複,有申請歷時3年先至獲批,促請當局簡化申請程序,安排專人隊伍協助漁民提出申請,同埋提供更多配套協助轉型。另一議員黃定光就質疑當局審批太離地,又重申一般漁民並唔習慣書寫文件,促請當局安排人手協助他們申請。

漁農自然護理署署理副署長黎堅明回應時就,當局舊年已經簡化申請表同申請程序,又安排秘書處向申請人講解申請流程,並且已經將工作小組同委員會嘅兩層審批架構簡化,變成得番一層,同時以傳閱方式處理爭議較少嘅文件。

佢又話經簡化程序後,所有嘅申請都可以喺6個月內完成處理,部分甚至快至3個月添!但佢同時重申,由於基金涉及公帑,當局必須審視申請項目是否可行,以確保資源用得其所咁話喎。

議員斥停發新牌 新血難入行

議員梁志祥就關注喺18宗獲批申請中,竟多達9宗係嚟自大學等學術機構,質疑基金並唔能夠真正幫助到漁民。而身兼委員會主席嘅漁農界議員何俊賢就批評當局漁業政策落後,又提到當局唔再發出新牌照,令到新血難以入行。

黎堅明回應時都同意漁民文書、技術上有困難,但就提到漁護署亦會擔任「媒人」角色,幫手配對一班漁民同學術機構合作,仲強調有3宗成功申請嘅案例添!佢又強調當局會繼續促進雙方交流,包括會繼續舉辦研討會同工作坊等。

政府過去一直被批評離地,原因在於推行政策時好少從受眾角度出發。漁護署肯順應民意簡化程序的確係一件好事,但基金2014年推出去到2019年先至簡化,要用上5年時間又係咪真係抵讚?

第一手消息請下載on.cc東網iPhone/iPad/Android/Windows Phone Apps