中環出更：指政府推垃圾計劃 港台遭圍插
年花10億港元公帑嘅香港電台（港台）劣迹斑斑，屢被批評節目立場偏頗。港台英文新聞疑似語帶雙關，以政府公布「最新垃圾計劃」為貼文內容，形容政府提出嘅廢物管理策略。有網民鬧爆港台先係垃圾，促即刻關閉港台。
港台英文新聞前日發布一篇新聞，關於政府提出應對直至2035年廢物管理挑戰嘅策略。之不過，港台喺社交網站Twitter發布呢篇新聞嗰陣，標題係「政府公布香港最新嘅垃圾計劃」﹙The SAR government announces its latest rubbish plan for Hong Kong）。隨即引起網民批評，直斥港台用納稅人嘅錢發布呢類垃圾貼文。
知衰改標題 網民唔收貨
港台亦「知衰」更改貼文標題，正正常常咁講番政府公布計劃以減輕堆填區負擔。亦都寫咗係代替原本可能造成誤解嘅貼文，希望澄清番。但網民當然唔收貨，話寫新聞標題寫成咁，港台先至係垃圾，仲要求即刻關閉港台添啊。其實港台一直未盡作為公營廣播機構嘅責任，到底政府幾時先肯正視問題呢？
本報向港台查詢，傳訊及節目標準組只係回覆話該貼文嘅意思被曲解，港台已經改用其他字眼並且重發貼文，並無回應係咪刻意使用誤導性嘅字眼。
卓妮