中環出更：預備責年食品 盧偉國推介上海熏魚
年近歲晚，又係辦年貨嘅時候啦。議員盧偉國講起舊時，各行各業都對農曆新年相當重視，歲晚收爐之後街市會休業好多日，因此大家都要買定一批食品「責年」。而適合「責年」嘅食品不但要襟擺，亦要講意頭，魚就係當然之選，以取其「年年有餘」咁話。
為咗預備「責年」食品，盧偉國日前就到大埔墟行咗一轉，用二千幾銀買咗條6斤重嘅魚，話可以分幾餐，以欖角豆豉蒸、乾煎或凍魚等幾種做法，咁就團年同開年都有得食啦。講起用魚製作嘅菜餚，盧話「上海熏魚」值得推介，因為做好之後放入雪櫃，隨時都食得，用嚟做冷盤固然適合，配烏冬或上海麵，風味絕佳！不過上海熏魚並非煙熏而成，而係將魚切塊加上醃料，放入雪櫃醃一夜，經油炸後再放落滷水汁浸到入味，其實唔難整㗎。盧又話第4波疫情近日雖稍有回落，但食肆嘅堂食限制未有放寬，睇嚟好多人都要喺屋企食團年飯，之不過自己下廚整番幾味，既可以拉近家人同朋友嘅關係，亦是生活情趣啊。
陳祖恒：太太精通中西韓日料理
經營餐飲業嘅香港青年創業家總商會主席謝海發（Calvin），早前佢就鑽研點樣整盆菜，事關一家人食飯而又唔想下廚的話，盆菜外賣無疑係一個理想嘅選擇。Calvin話將廿多種食材共冶一盆看似簡單，但其實喺製作上都好花工夫，譬如飽魚同魚蛋嘅烹調就有好大分別，加上唔同嘅食材，所需嘅醬汁亦各異，而點樣物色適合一整盆盆菜嘅醬汁就頗花心思。
香港工業總會副主席陳祖恒，就話自己屋企有一位大廚！原來佢太太經營法國餐廳，仲發展到擁有廚師團隊，依家太太不時喺屋企大展廚藝，咁佢自然就有食神啦。陳祖恒話中西韓日料理，太太都可以一手包辦，仲要擺盤配合，好睇又好食！佢又透露，太太婚前曾隻身到法國學廚，餐廳近來推出外賣自取套餐，顧客買走後只需要加熱就可以享用，而且仲教埋如何擺盤，相當精緻、方便咁話。
卓妮