政情：妄指李運強受冤獄 鄭錦滿被嘲「代佢坐監」
染疫男子李運強，舊年因怕打針而逃離醫院，遭緝捕後被控一項「任何人不得使他人蒙受感染的危險」罪，前日被判囚4個月。之不過，呢單聽起上嚟好平常嘅新聞竟然仲有餘波，事關熱血公民成員鄭錦滿就喺Facebook（Fb）留言，形容李運強蒙受「冤獄」，仲話佢「根本唔應該受罰」。結果言論一出，隨即惹嚟唔少網民批評。
有網民就留言，反問鄭係咪覺得李嘅行為做得啱，仲問若果自己嘅親人因此而被傳染嘅話，仲會唔會講得出呢番說話。亦有唔少網民留言寸鄭，唔單止問佢會唔會幫李打官司「上訴對抗瘟疫極權」，亦有網民叫鄭不如代李坐監以彰顯制度不公，更加有人反問鄭會唔會去劫獄添！
而其黨友、議員鄭松泰尋日亦喺Fb發貼文評論事件，形容鄭錦滿係被大量「黃絲」同「藍絲」狙擊，仲嘲諷話「其實香港真係幾易管治」喎。