政情：垃圾滿郊野 陳沛然帶囡囡執足6袋
政府不斷做宣傳，呼籲公眾唔好亂拋垃圾，去郊外就要自己垃圾自己帶走，但似乎冇人聽政府支笛，曾經有人將包垃圾掛上樹，擺明係諗盡辦法唔帶垃圾走。醫學界議員陳沛然（Pierre）尋日就喺Facebook上載郊野燒烤場嘅相片，只見大大小小垃圾四散喺地下，搞到佢忍唔住要教囡囡一齊執垃圾。
提醒市民帶走自己垃圾
其實星期日絕對係享受家庭樂嘅日子，Pierre尋日就帶埋囡囡去行山，點知路過郊野燒烤場時，就見到有好多垃圾散落一地，而燒烤爐嘅炭更未完全熄滅，認為有人前日曾經喺到開派對。Pierre見到成地膠袋同空樽，即刻「路見不平」，決定要教囡囡一齊執垃圾，最後仲收拾咗6大袋垃圾，認真誇張喎！不過經過Pierre同囡囡清理後，燒烤場立即變得乾淨晒。Pierre最後仲呼籲大家要愛護大自然，自己嘅垃圾自己帶走。
其實經常都有啲冇公德心嘅人喺行山或去郊野地方時亂拋垃圾，影響其他人之餘更加嚴重破壞環境，政府真係要諗吓計點樣主動阻止呢啲情況發生，唔好再等市民打「1823」投訴先做嘢！