雙重國籍存異心 兩家茶禮點表忠

人心欲壑難填,得一想二,日常生活見怪不怪。呢,有人就感嘆:人啊人,長了顆《紅樓夢》嘅心,卻生活喺《水滸傳》嘅世界;想話結交啲《三國演義》嘅桃園弟兄,卻總遇到《西遊記》裏面嘅妖魔鬼怪!其實,人生又邊會有成世咁好彩㗎,兩家茶禮食到舔舔脷,都不知今夕何夕,竟是誰家之天下!

唉,回歸超過23年,總不能只換了一面旗而人心依然戀殖成癖,黑暴期間,公僕「吃飯砸鍋」,簡直不成體統!阿哥,正如尋日「正論」指出:港人治港路不通,愛國方能治香港!功夫茶大早亦明言,香港行「一國兩制」,BNO變成「第三制」,充滿殖民地色彩,阿爺係時候要端正主人家心態,要嚴格執行《國籍法》,公務員既然已對特區政府宣誓效忠,中國政府亦宣布不承認BNO護照為旅行證件及身份證明,香港特區政府也即時作出同樣安排,BNO擺明已經作廢,公僕做乜仲要攬住佢唔捨得放棄?練神功乎?

嗱!外界關注應同時要求公務員放棄持有BNO,即係話,BNO或港人身份,只可二擇其一,唔可以再食兩家茶禮咁着數!之不過,公務員事務局局長聶德權尋日就表示,公務員擁有國籍嘅安排,係根據《基本法》及現有規定進行,唔應該將兩件事混為一談喎!佢仲理直氣壯咁話,對於中方有關「愛國者治港」嘅言論,即係要擁護《基本法》,接受香港嘅憲制秩序,認為公務員作為政治體制嘅一部分,係有同樣要求。

聶局長睇怕仍然在夢中,留戀緊97回歸之前擁有BNO護照,甚至居英權嘅公務員不知凡幾!之不過呢段「光輝歲月」,隨着阿爺執正來做,「一國兩制,港人治港」經過逾23年實踐,證明荒腔走板,變質變味!唔落實「愛國者治港」,禁止雙重國籍,香港唔會有前途!即係話,公僕一係攬住BNO去「日已落國」捱fish & chips,一係放棄位高權重厚酬嘅鐵飯碗,唔可以再上下其手,身在漢營心在曹,食兩家茶禮咁鬼過癮!

事實上,唔正本清源,搞清效忠問題,特區政府難浴火重生!功夫茶記得前京官被問到特首人選嘅條件,就開出4大標準,即愛國愛港、中央信任、有能力管治及受港人擁護,一句到尾,都係忠誠度最重要!正如有論者指出,任何一個國家或地區均不會容許國民擁有雙重國籍,尤其問責高官及公務員,是以特區政府應一次過規定公務員放棄BNO!這是關乎人的問題,更關乎政治忠誠,絕不能模棱兩可!

要言之,就係「愛國方能治香港」,否則幾叻都係要走佬!聶局長,時移世易,不能一本通書讀到老!香港當務之急,係要忠臣謀士,真正愛國者治港也!