中環出更：把握廠商回流趨勢 葉中賢：善用舊工廈發展新工業
七、八十年代，本港工業北移，時至今日慢慢出現工業回流嘅情況，香港工業總會主席葉中賢尋日出席一個記者會時就話，近年有唔少香港廠商，原本喺深圳、東莞設廠生產，近年有見香港稅率低，部分已逐漸遷移返港，認為本港有一定優勢，政府應把握機會，善用空置嘅舊工廈，進行高端工業，並將傳統工業轉為新工業。
葉中賢解釋，工廠回流全因「唔方便」，唔方便嘅係指部分電子零件，以及金、銅等比較貴價原料，由香港進入內地製造，好多時需要打稅，產品製成運出香港又要退稅，過程非常複雜，況且唔係所有嘢內地都有得供應，唔少電子通訊設備或零件都需要由外國入口，輸入內地要通關報關，順利的話一日搞掂，否則有機會影響生產。
莊子雄：香港製造口罩最出名
反觀香港出入口免稅，加上香港製造有一定優勢。佢話近年政府資助工業用地，其實只要好好利用空置嘅舊工廈，租金冇咁離地，係相當有競爭力嘅，但規模確實有限制，所以一定要做高端工業，例如檢測、設計甚至食品工業等，將以前人手生產，轉為智能化、數據化，將傳統工業轉為新工業，由新一代接手。
工總副主席莊子雄就提到香港製造，佢話現時香港製造最出名要數口罩，佢話香港出現疫情，只係短短幾個月就出現200間口罩廠，仲要行銷全世界，可見係有質素、有信心！所以不斷發展及完善香港製造，係工業發展唯一方向。佢仲講到現時環保回收要本地化，好似舊電視機等，已經不可進入內地，我哋要諗如何拆件，再循環使用有用嘅物資；另外就係微電子工程，唔需要好多地方及人手，因此相當適合香港，目標係希望支援業界部分高增值產品，如醫療設備，測試儀器等都有一定市場。
另一名副主席查毅超同樣認為本港工業有發展空間，但就需要政府政策配合。佢仲提到，自己早前確診新冠肺炎，雖已康復但身體狀況不及往時，又笑言自己唔能夠大聲講嘢，一班同事都因為佢說話變得特別溫柔，而變得開心咗。
卓妮