政情：呻22萬訟費獨力難支 梁凱晴發起眾籌
觀塘區議員梁凱晴上年聯同「東九龍社區關注組成員」鍾健華提出司法覆核，要求暫停造價5,000萬元嘅觀塘海濱音樂噴泉工程，但因為未能申請法律援助而撤回，上年年底被高等法院追討22萬港元訟費。面對高昂訟費，梁凱晴尋晚喺Facebook發文，坦言難以獨力支撐，決定發起眾籌以籌集訟費。
入稟圖煞停音樂噴泉遭撤回
梁凱晴話，觀塘區議會上年初通過要求叫停觀塘海濱音樂噴泉工程工作，但政府一直漠視民意，拒絕其他更符合區內醫療及社區需要嘅設施，將半億公帑強推不合市民所用嘅音樂噴泉。所以佢聯同鍾入稟法庭，試圖以司法覆核煞停半億觀塘音樂噴泉，以求彰顯規劃公義喎。
撤回司法覆核申請後需要畀訟費，梁就話政府收緊法援，令民間團隊難以負擔高昂法律費用，又指民政事務總署、立法會財務委員會主席同埋立法會民政事務委員會主席，罕有地三方面追討訟費，令佢哋需要償還高達22萬元嘅訟費。
所以經過數周時間、思考唔同嘅應對方法後，佢都未有合適方法解決，決定發起眾籌喇。