政情:建制唔益攬炒派 促削區會撥款權

由民主派主導嘅區議會上任逾一年,除咗多次被批評話佢哋審批撥款時有私相授受、「分豬肉」之嫌外,舊年更一反傳統拒批資助予團體舉辦龍舟比賽,引起社會不滿。有立法會議員聯同一班建制派區議員尋日就與民政事務局局長徐英偉會面,除咗要求政府盡快修例要求區議員宣誓外,仲建議政府收番部分區議會審批撥款嘅權力,而局方都話會積極考慮咁話。

新一屆區議會舊年上任以來,除因為政治立場問題引發嘅「動盪」不斷,就連舊年大部分7.1及10.1活動撥款,都遭區議會否決咗。更有不少傳統地區活動撥款受到阻撓,其中大埔區區議會拒批資助予大埔體育會,導致已有多年歷史嘅大埔區龍舟競賽被迫停辦,令唔少市民都極為失望。

批做政治騷 撥款如圍標

深水埗區議員劉佩玉話,舊年18區區議會「社區參與計劃」獲超過4.6億港元嘅政府撥款,但不少市民都批評有關撥款唔係用於民生事項,反而係做「政治騷」推動疑似「港獨」及「反中亂港」活動。九龍城區議員何顯明亦表示,「攬炒派」撥款離譜,形容現時區議會撥款方式如「圍標」,有「分豬肉」之嫌。

劉國勳:徐英偉認同建議

見到區議會撥出嘅資源比過往少,區議會(第一)議員劉國勳(阿勳)都認為情況唔理想,直言如果繼續畀資源地區,但又唔舉辦呢啲傳統節慶活動時,反問何必仲要畀錢區議會呢?佢認為若有關撥款機制長期失衡,政府應該重奪部分撥款權,包括有關舉辦傳統節慶活動嘅撥款申請,仲引述徐英偉話好同意呢個建議喎。

此外,會上亦有傾到近日大熱嘅區議員宣誓議題。阿勳鬧爆「攬炒派」以區議員身份玩弄政治,利用區議會作為宣揚反中亂港嘅平台,蓄意同中央及特區政府搞對抗,86位建制派區議員日前已聯署,要求政府修訂《宣誓及聲明條例》同時,要一併修改《區議會條例》,列明一旦有區議員違誓即喪失資格。

阿勳話,會上佢哋建議由徐英偉或更高級問責官員作監誓人,亦希望政府研究相關嘅宣誓條例會否設有追溯期,並成立官方監察組織跟進違誓區議員情況等。之不過,尋日喺會上政府似乎都未有進一步交代完整嘅修例時間表,睇怕當局都要快啲公開相關工作嘅進度,等大眾心中有個譜。

第一手消息請下載on.cc東網iPhone/iPad/Android/Windows Phone Apps