政情：覆核何君堯葛珮帆議席郭卓堅被拒

「長洲覆核王」郭卓堅於2017年入稟，指控於2016年立法會選舉當選的何君堯、葛珮帆和柯創盛涉嫌虛報專業資格與學歷，申請司法覆核要求褫奪議席。原訟庭喺上周三開庭聽取郭、以及何葛兩位議員嘅代表律師陳詞後，尋日頒判詞裁定唔會批出訴訟許可，郭嘅申請不獲受理。

法官周家明喺判詞中指出，郭質疑何葛柯3人當選，但當選並唔係佢哋3人嘅決定，郭將佢哋列為答辯人係錯誤。而有關選舉嘅爭議，應以選舉呈請嘅方式提出，而非申請司法覆核，況且葛柯兩人並非喺郭所屬嘅選區參選。

再者，就算郭有權司法覆核選舉結果，但其申請卻逾期超過9個月，而郭亦無為延誤提供合理解釋。綜合上述原因，法官認為不應批出訴訟許可。

議員何君堯回應法庭判決，指郭卓堅嘅申請係瑣碎無聊，欠缺法理根據，浪費納稅人嘅金錢與司法系統資源，斥郭提出司法覆核申請係「出風頭」行為。至於議員葛珮帆就指判決合理，又批評郭旨在騷擾建制派議員。

政情：覆核何君堯 葛珮帆議席 郭卓堅被拒