政情：年初二向車公求籤 鄉委會疫下轉低調
每逢大年初二車公誕，鄉議局同沙田鄉事委員會都會聯同一眾鄉紳，去車公廟為香港求籤祈福，呢個習俗唔經唔覺已經維持咗好多年喇，但今年疫情比往年更嚴峻，祈福儀式會否就此取消呢？沙田鄉事委員會作為主辦方，委員會主席莫錦貴就話會如期舉行，但就會早啲進行求籤儀式，以避免人群聚集喎。
話說政府早前縮小年宵市場同埋新春市場嘅規模，以減少群眾聚集。對於年初二(2月13日)新界鄉議局到沙田車公廟求籤活動係咪仍可以照常舉行，鄉議局主席劉業強就話局方希望可如常進行，但認為到時有機會簡化程序。而莫錦貴就話到依家為止，都認為當日會舉行求籤同祭祀儀式，但就會提早進行。
或實施人流管制 難上頭炷香
劉業強預料車公誕當日嘅儀式都會簡化程序，可能淨係得鄉議局同埋沙田鄉事委員會嘅正副主席、區議會主席同埋民政事務專員入內祭祀，記者採訪區亦可能有所限制。莫錦貴就話會繼續舉行求籤祈福，但會提早喺善信湧至車公廟前完成儀式，場內亦可能有人流限制。
對於當日市民求籤安排，劉業強認為花市可以喺有限制情況下舉行，車公廟求籤亦應該冇乜問題，但唔排除善信需提早預約先可入內，主辦方亦可能實施控制人流嘅安排。咁睇嚟市民今年若然要想搶到頭炷香，就真係難上加難喇！
徐英偉未知會否代政府求籤
話說其實政府都會派代表去車公廟，多數都係搵民政事務局局長代勞，唔知徐英偉點睇呢？佢就話細節都要睇疫情再公布嘅，但自嘲話成日落疫區，市民見到佢都驚，同埋佢都唔係咁需要去車公廟求籤喎。佢又話成日有人叫佢去活動做主禮嘉賓，但一陣時又話因為社交距離限制，交條影片都好開心嘅。唔知求籤當日，佢會出現喺現場定係上載條影片呢？
其實講開又講，有傳車大元帥喺宋朝嘅時候唔單止平賊有功，仲可以震懾瘟疫，咁點解香港疫情遲遲未好轉呢？不過呢啲都係信則有不信則無嘅，始終事在人為，反而政府抗疫不力就真係眾所皆知喇！