笑看天下:基層裝何面目拜新年

「物以終為始,人從故得新。」迎春接福,大家所願,之不過,新冠肺炎第4波疫情爆到失控!沒有花市,沒有煙花,沒有許願樹許願,「恭喜發財」有口難言,還有多少市民覺得自己是在「過年」,心裏有「普天同慶」之悅?

庸官一再收緊禁聚令,晚上禁堂食,酒樓食肆一片哀嚎,但疫情並未見受控!年近歲晚,政府叫人咪同家人團聚,呢個新年大家食自己啦!反正市面一片蕭條,市民由去年初抗疫抗到新一年,已習慣庸官嘅無能,只能自求多福!老朽已習慣晚晚在家煮食,老人家不宜油膩,麥皮清粥簡簡單單又一餐!

年紀大機器壞,「身老怯增年」,新一年,老朽最大願望不是「老謀深算」,而係「不癡不聾」,最緊要腰骨挺直,膝頭哥仍有力,踎得低不能昂然企番起身都能夠慢慢站起來!大家千祈唔好笑,老朽早前仆倒兩次,一次落小巴就係不知何故控制不了而仆倒,幸好只擦傷了手掌心和膝蓋,碎了老花眼鏡!另一次出門丟垃圾又不知何故失去平衡,差點兒跌碎腕骨,幸好只是左手腫了,找跌打老師傅療傷3次已無大礙,右手仍能寫字賣文,否則斷炊就大鑊!

講起斷炊,政府防疫抗疫失策,保就業又唔到位,今個牛年,打工仔睇嚟冇啖好食!呢,財爺日前發表網誌吹淡風,料失業率創16年新高,升破7%,增至27萬人丟飯碗!事實上,旅遊、餐飲、零售業已經嗌晒救命,餐飲業盼春節期間堂食可以到晚上9時,容許晚市5至6人一枱。不過,庸官連家庭團聚都想叫停,餐飲業呢個願望恐怕要落空!新年過後,肯定掀起更多結業和裁員潮,破產申請個案必大增。

政府抗疫無能,一味懲罰市民,香港儼然成為悲情城市,市民搵食艱難,物價又貴,一隻兩斤多嘅活雞要250元,新鮮豬肉亦貴到飛起,基層裝何面目拜新年?