政情：余鵬春喜獲孫女 表情多多勁得意
疫情已籠罩咗全球接近一年，大家心情或多或少都有啲沉重，之但係本身經營國貨公司嘅香港中華總商會常務會董余鵬春（PC）前日就為大家帶嚟喜訊，事關佢升呢做阿爺。佢喺社交網站宣布孫女出咗世啦，仲話新抱同BB都好健康，而佢再做爺爺都非常開心同感恩，希望孫女可以開開心心、快高長大咁話。
PC尋日話孫女英文名叫Kori，出世時有7磅重，而孫女出世冇幾耐就好多笑容，令佢哋覺得好得意同超開心。咁又係啊，見到PC上載嘅孫女相，張張都表情多多，的確係好得意o架，唔怪之得氹到爺爺咁開心喇！
依家PC最想就係快啲見到孫女，事關醫院因應疫情只可以畀爸爸陪產，所以PC前日都係透過阿仔同佢視像通話先見到孫女咋。PC話佢哋已經做好準備迎接孫女返屋企o架啦，唔單止布置BB房、買BB衫，佢哋仲專登買咗部病毒快速測試機，等所有人喺探BB之前都可以確保自己健康咁話。