政情：政助跳船後 再有4官員執位
前日有消息指民政事務局局長政治助理黎穎瑜，因家庭理由請辭。政府發言人尋日確認消息，話黎目前假，將會喺下周三（20日）離任。民政事務局局長徐英偉感謝黎任期內作出嘅貢獻，並衷心祝願黎生活美滿。
黎穎瑜喺社交平台透露，指丈夫喺新加坡土生土長，因為佢嘅緣故而定居香港多年，但丈夫現時已經返回新加坡，考慮到兒子年紀仲細，需要媽媽喺身邊照顧，所以決定辭職。
王天予將任運房局常秘
除咗黎穎瑜跳船，告別官場之外，政府尋日公布4個高層任命，海事處處長王天予將於下月一日出任運輸及房屋局常任秘書長（房屋）/房屋署署長，其空缺將由商務及經濟發展局副秘書長（通訊及創意產業）袁小惠接替，發展局副秘書長（規劃及地政）何珮玲將會喺今個月18日出任政策創新與統籌辦事處總監；至於差餉物業估價署副署長蕭家賢將會喺下個月8日出任差餉物業估價署署長。
公務員事務局局長聶德權話，王天予、袁小惠同何珮玲都係資深政務主任，具備出色領導同管理才能。相信3位能夠喺新崗位為市民提供專業高效嘅服務；而蕭家賢就具備優秀嘅管理同領導才能，喺差餉物業估價方面擁有豐富嘅專業知識同經驗。深信佢能夠帶領差餉物業估價署面對嚟緊嘅挑戰。