政情：遭網民翻舊帳追擊 邊開會邊揸車 郭偉强認衰自首

話說前日嘅視像會議，郭偉强雖有虛擬背景嘅「掩護」，不過倒後鏡、平安符同埋車頭掛口罩等「穿崩」嘅畫面，以及佢扭軚嘅動作，從而被揭發一邊揸車一邊開會。事後佢喺社交平台自招，話已盡快喺適當位置停車繼續會議，之後就死撐，話喺民主派士氣低到極點時，畀個機會大家「圍爐自high」，算係以德報怨喎。之不過好多網民都唔賣佢帳，鬧爆佢嘅留言如雪花飄至。

下午迴避傳媒 晚上前往警署

唔知係咪預計會被傳媒追問，尋日立法會內務委員會召開前，郭偉强喺黨友陪同下主動會見傳媒，話會深刻反省其駕駛態度，承諾日後會嚴格遵守道路交通使用者條例，並鄭重、誠懇地向公眾致歉，又指如有任何對於佢嘅調查行動，會全力配合。講完之後佢就步向會議室準備開會，期間有傳媒分別以英文同中文追問，包括用咗幾多時間揸車開會、會唔會自首等，但郭只係用中文講多謝傳媒提問，重複話會反省駕駛態度，同配合一切調查，之後就進入會議室。不過去到晚上，佢就去咗警署自首喇。

曾因Cut線被控不小心駕駛

郭偉强昨日曾透過社交平台再致歉，不過就有唔少網民指犯法就係犯法，要求佢去自首；亦有網民搵番過往佢因Cut線而被票控不小心駕駛，之後被裁定罪成嘅案件。除此之外，亦有網民舊事重提，指郭偉强喺上年5月內委會上扯跌前議員陳志全嘅案件，話佢雖因律政司介入而獲撤控，但仍未就事件道歉，質疑佢整傷人都可以冇事，預料佢就算干犯危險駕駛，怕且都唔會被警方起訴。而陳志全就透過社交平台指，話莫講話用Zoom開會，司機喺駕駛期間睇戲，都係不小心或危險駕駛。

今次搞出個大頭佛，郭嘅黨友麥美娟就話任何人都需要注意駕駛安全，仲幫手解畫話，近日立法會嘅會議都改晒時間，議員需預留時間做其他事務，未必有特定位置開會。而建制派「副班長」陳克勤就話，之前立法會簡介Zoom時，都有提醒議員要坐定定，避免信號接收得唔好，喺前日事件發生後，佢亦都溫馨提示建制派要坐定定開會。

雖然話有溫馨提示，之不過郭偉强聽唔聽就另一回事喇，否則又點可以應驗「人類總要重複同樣的錯誤」呢句說話？

警方回應指，根據第374章《道路交通條例》，為保障行人安全，各駕駛人士必須留意路面情況小心駕駛，切勿以身試法。