中環出更：逆境未見曙光 趙彼得：以銷售技巧應對
經濟蕭條、公司倒閉、企業裁員等不利消息，近一年來可謂不絕於耳。傑出企業公民協會主席趙彼得（Peter），指現時全世界都面對史無前例嘅困局，無論係老闆抑或打工仔都人人自危。點樣度過呢個猶如睇唔到曙光嘅長夜，除咗保持樂觀嘅心態，以及不斷充實自己，最好就係具有銷售人員嘅技巧同心理素質。
究竟銷售人員同逆境，有咩關係呢？Peter解釋話，論面對挫折之多，相信無人及得上銷售人員，事關銷售同拒絕就好似一對齊上齊落嘅孖生兄弟，所以成功嘅銷售人員，無論智商、情緒同逆境情商數都會較高，況且要達成一宗銷售，就必須具有良好嘅溝通同判斷能力。鑑於時下好多企業，都苦惱於現金流嘅問題，如果呢個時候懂得利用銷售技巧謀取收入，咁就可望延續企業嘅生存，打工仔若果把握傑出嘅銷售技巧，老闆請食無情雞嘅機會，自然大幅降低。
趙善智：化絆腳石為台階
儘管未見隧道嘅盡頭，不過「正能量工作室」領袖及團隊潛能發展專員趙善智（Stanley）認為面對困局，切忌持消極思維，事關思維會影響行為，行為會養成習慣，習慣會塑造性格，性格會影響命運，既然逆境係無法避免，何不以積極態度嚟看待呢？Stanley形容人生就好似玩啤牌，若果手握4條「A」就最好啦，但一手爛牌的話莫非就此認輸？其實將絆腳石化成更上一層樓嘅台階，先至係人生成就啊。
稻苗學會會長黃傑龍都話以積極態度嚟面對困難，第日至可以同兒孫分享打逆境波嘅經歷。佢話舊年被第一波疫情殺個措手不及，旗下十多間火鍋店需停業一個月，期間一毫子收入都無，當時佢都好擔心自己盤生意到底可以捱得幾耐。為給予客人信心，佢迅速為旗下食肆加強防疫措施，雖然危機未過，但每當疫情趨向緩和，公司業務都有唔錯嘅回升，並為新嘅一年打下強心針。
卓妮