政情:大嘥鬼出閃卡 MK風醉曖環保

政府最受歡迎嘅吉祥物「大嘥鬼」有「閃卡」流出!過去一直諗頭多多、經常用唔同方法宣傳環保資訊嘅「大嘥鬼」,前日(12日)竟然就喺Facebook上載自己嘅「閃卡」,見到卡上面冇着衫、光禿禿嘅佢就拎住個環保袋出街購物。佢仲用MK風格嘅文體寫貼文,向全世界宣告自己「醉曖環保」(最愛環保)添!

網民:有冇星星閃特別版

雖然「大嘥鬼」呢隻卡通公仔過去一直都用唔着衫嘅形象示人,但諗到用「閃卡」同「MK風格」嚟宣傳環保,呢條橋都真係幾爆喎!「大嘥鬼」就話:「其實做甘多嘢,刀系想大家米嘥嘢!」(其實做咁多嘢,都係想大家咪嘥嘢!)

貼文大sell懷舊風,當然吸引咗唔少網民留言。有人就問「大嘥鬼」,究竟卡背後有冇印到佢首廣告宣傳歌嘅歌詞?而網民唔單止想要「大嘥鬼」嘅「閃卡」,更加問有冇「星星閃特別版」?唔知環境局局長黃錦星又會唔會為環保而「犧牲」呢?

第一手消息請下載on.cc東網iPhone/iPad/Android/Windows Phone Apps