受疫情影響，民政事務總署早前曾要求區議會暫停或者推遲會議，但灣仔區議會尋日如期召開第9次大會，會議原定下晝兩點半開始，然而去到2點45分，都只得5個區議員出席，仲差兩個人先至夠法定人數開會，主席楊雪盈宣布流會，佢對區議會連續兩次流會感到失望同遺憾，認為一眾區議員作為民選代表，理應出席會議，履行議員職責。
缺席嘅區議員究竟去咗邊度呢？區議員梁柏堅喺流會後大約15分鐘，上載相片到社交平台，原來佢同另外3位區議員張嘉莉、邱汶珊、李永財，去咗民政事務總署遞交抗議信，要求總署更改指引，敦促民政處喺做好防疫措施嘅前提下舉行區議會會議，或者好似其他政府部門一樣舉行視像會議，並統籌各政府部門出席，畀區議員能夠有效執行職務。
至於區議員黃宏泰就指疫情嚴峻，會議前曾通知主席楊雪盈，將會缺席會議。不過楊就拒絕黃嘅缺席申請，話區議員只能以身體不適為由告假。
區議員陳鈺琳對流會表示可惜，指立法會有幾個事務委員會都曾利用視像形式舉行會議，佢本人亦曾經出席社會福利署舉行嘅東區及灣仔區安老服務協調委員會嘅視像會議，認為政府部門並非冇能力透過視像舉行區議會會議。副主席麥景星話疫情爆發以嚟，好多政府部門已採用視像形式舉行會議，質疑灣仔民政處點解連區議會開會嘅基本要求都唔能夠配合，又批評政府同民政處過去經常拉隊離場，先至係導致區議會失效嘅一方。