中環出更：「朋友」嗌買點數卡 陳克勤托手㬹

克勤尋日喺Facebook上載咗一張對話截圖，話有個「朋友」問佢可唔可以幫手去便利店買兩張點數卡，夾埋都要2,560蚊。克勤當時就同對方講無咁多錢淨係買住一張先。原來佢唔幫手，係因為呢個「朋友」係騙徒，仲話被冒認嘅嗰位朋友根本連點數卡係咩都唔知，又點會叫佢幫手喎。佢就指自己作為立法會保安事務委員會主席，當然會再三核實求助者身份，無咁易上當。

籲小心核實身份 提防騙徒

其實今次已經係佢喺一個月內，第二位朋友嘅通訊軟件帳戶被入侵。佢話早前有位朋友嘅帳戶被盜用後，就向佢發訊息話自己手機壞咗，要求佢幫忙撳入一條可疑連結，拎返個驗證碼。佢話一睇就知道係騙徒，如果自己撳入連結，就到自己受害，直言自己「無咁笨」。

克勤仲藉呢個機會提醒市民，最近有唔少呢類騙案，希望大家打醒十二分精神，小心核實身份之餘，仲要開啟通訊軟件嘅雙重驗證功能，好好保護自己帳戶免被盜用啊。