政情：安心出行冇人用 見步行步點抗疫
政府舊年推出「安心出行」流動應用程式，畀市民自己記錄低行蹤，之不過程式推出兩個月來，市民反應頗為冷淡。觀塘區議員顏汶羽批評，政府雖到處張貼二維碼，市民就繼續唔用，措施不但形同虛設，更反映政府嘅抗疫思維只係見步行步咁話。
區議員斥政府拖拖拉拉
顏汶羽尋日上載短片，指設立「安心出行」流動應用程式嘅原意本來係好，但要市民自動自覺下載程式，然後去到邊都乖乖咁攞部手機出嚟掃描二維碼以記低自己去過邊，呢個政府會唔會係太天真呢？當政府發現效果不似預期，最新嘅應對方法就係要幫個流動應用程式增加自動記錄行蹤，又考慮強制市民安裝，不過衞生防護中心傳染病處主任張竹君都講過，「安心出行」流動應用程式根本唔係為追蹤工作而設，只係畀市民知道自己到過嘅地方是否曾有確診者踏足。顏批評政府將個程式嘅功能、性質改嚟改去，足以反映政府嘅抗疫思維只係見步行步。顏又建議政府，一係唔做，一做就要一步到位，唔好拖拖拉拉，否則只會淪為擾民措施。