政情:特製虛擬背景 視像會議如置身立會

因應新冠肺炎疫情影響,唔少機構都轉用視像會議軟件繼續工作,立法會早前已經用Zoom召開非正式會議,早前議事規則委員會通過,喺事務委員會同埋法案委員會上都用埋Zoom,尋日就喺內務委員會獲大比數通過,議案喺嚟緊嘅星期三大會再審議處理。

兩委員會皆用Zoom

議員喺立法會發言就受《立法會(權力及特權法)條例》(特權法)保障,尋日法律顧問喺內委會上解釋,指立法會有權規管內部事務,可以自行制訂程序,如立法會確立,議員亦會受特權法保障。唔少議員支持用Zoom開會,但熱血公民鄭松泰就覺得政治上不可接受。立法會秘書長陳維安就話,用Zoom開會可以減少職員返立法會工作,仲話Zoom係廣泛應用,又可以做即時傳譯。

自從可以用Zoom開會後,有議員就發現入面所提供嘅虛擬背景太少,所以立法會秘書處就特登製作9款虛擬背景,仲要全部都係取材自立法會唔同角落,例如會議廳嘅議員座位、立法會大樓外貌、「立」字背景等等。今年唔少人因為冇得去旅行而睇番旅行相當去咗,唔知依個方法又會唔會令班議員就算唔喺立法會,都可以有種身處立法會開會嘅感覺呢?

第一手消息請下載on.cc東網iPhone/iPad/Android/Windows Phone Apps