政情：服刑一個月 黃之鋒：已適應獄中節奏
已解散嘅香港眾志前秘書長黃之鋒、前主席林朗彥同前成員周庭，就2019年6月包圍灣仔警察總部，於去年12月2日遭到判刑，其中承認煽惑及組織未經批准集結兩罪嘅黃之鋒被判處監禁13個半月。服刑一個月左右，南區區議員袁嘉蔚尋日去石壁監獄探黃，仲話黃已經適應咗監獄入面嘅節奏喎。
聽電台流行曲免脫節
袁嘉蔚喺社交平台貼文，話今日開咗一個多小時車先至到石壁監獄，見到黃之鋒嘅頭髮長咗唔少，就提醒佢要整理一下。而黃被囚一個多月，已經適應監獄內嘅節奏，會喺單調嘅時間表之中把握時間睇書同寫信。最近黃都有收聽電台節目同埋流行曲，希望盡力同外面嘅世界同步。
至於黃之鋒嘅社交平台尋日亦有更新近況，由探訪嘅親友傳嚟口訊，話佢喺入獄之前比較忙碌，無太多時間聽歌，反而入獄後先有機會間中聽聽電台節目，仲話覺得廣東歌對佢嚟講真係好重要添！