中環出更：曾指貧窮數字僅為「鬧政府」 羅致光反口：唔係冇意義
本港最新貧窮人口高達149萬人，創11年新高，但勞工及福利局局長羅致光早前「死撐」數據未計及扶貧政策成效，質疑呢個數字嘅唯一作用係「鬧政府」。立法會福利事務委員會尋日召開視像會議期間，羅致光突轉口風，話從來冇表明有關數據冇意義，又話「冇意義就唔會計出嚟」，強調自己唔係擔任扶貧委員會嘅主席，只係一個經常對外解畫嘅成員喎。呢啲叫反口定係官字兩個口？
自己只係負責解畫
議員陸頌雄喺會上指本港舊年有149萬貧窮人口，羅致光覺得冤枉，曾指「除咗攻擊政府之外就冇意義」。陸認為有關數字並唔係用作「抽政府水」，可反映出本港貧富懸殊嚴重、青年難以向上流等問題，即使政府扶貧有一定成效，亦難以抹去市民嘅貧窮感同不足感，促請當局盡快推動本港經濟結構轉型，並幫助基層增加收入。
但羅致光回應時話冇表明有關數據冇意義，又話「冇意義就唔會計條數出嚟」，有助政府分析扶貧政策成效。佢強調扶貧委員會係由政務司司長張建宗領導，自己只係負責解畫嘅成員，如果涉及整個社會嘅財富分配政策或產業結構轉型等，需要多個政府部門共同合作，自己亦會參與及討論。
卓妮