中環出更：檢測制度漏洞百出 七國咁亂 議員促統一專人採樣
新冠肺炎第4波疫情肆虐，微生物學系講座教授袁國勇日前指，過去一年有3％嘅新冠病毒檢測樣本中搵唔到人類嘅基因，而當中又涉及高危群組，意味住有人純粹遞交水喉水來蒙騙政府。議員田北辰就指檢測種類繁多，既有專人採樣又有自行提供深喉唾液；狠批政府檢測制度七國咁亂。
田指自己向來都堅持所有驗測必須統一做鼻腔及咽喉合併拭子檢測，並由專人採樣，確保樣本可靠性。佢話因為強制檢測嘅人，唔係個個都願意驗測，可能顧慮到萬一確診會手停口停，但政府實施政策就要諗盡一切嘅可能性。田稱尋日向政府查詢，問點解強制檢測仲有分專人採樣同自行提供深喉唾液，政府答唔出。
強制自願皆應免費
咁係咪人手唔夠？田話政府都無答。不過佢指依家有19個社區檢測中心由專人採樣，有朋友反映即使無預約都可即時提供服務。田認為好多市民唔去做檢測，係覺得深喉唾液檢測兒戲，而比較準確嘅人手採樣就要畀錢，所以若果要鼓勵市民自願檢測，無論強制還是自願檢測都應該一律免費，並由專人取樣，持久提供服務。卓妮