政情:中學時代被屈偷銀包 陳梓維記到依家

幾乎人人都有不愉快嘅過去,以致見到某啲事物就會觸景傷情。油尖旺區議員陳梓維日前就收到一封中學嘅邀請函,點知就勾起咗佢嘅傷心回憶,原來當年佢曾經被屈偷銀包,不過好彩最後證實唔關佢事。

陳梓維喺Facebook上自爆,話收到一封中學邀請函,邀請佢出席該校嘅校園導賞同埋體驗活動,腦海中即浮起當年讀中學時,喺學校發生銀包失竊事件。雖然當時佢一再澄清,自己喺班房裏面瞓着咗,但老師就憑佢曾經講過目睹失竊嘅銀包,從而一口咬定佢係偷咗!

不滿校方仍未道歉

無啦啦被屈偷銀包,陳梓維就話要求見校長,但點知校長都認定係佢做。幸好有個同學喺放學時,肯證明佢係清白,所以先冇事咋。佢仲提到話,當年有份處理事件嘅班主任喺翌年離校,校長就升為校監。同時佢都話學校處理失竊事件唔可以睇單一證據,仲話學校成日教人做錯事要道歉,不過校方至今仍未就事件向佢道歉,咁就難怪佢記到依家啦!

第一手消息請下載on.cc東網iPhone/iPad/Android/Windows Phone Apps