中環出更:鍾情古董衣車 林麗娜讚玩味十足

老舊嘅衣車雖然係一種縫紉工具,但若果保留到今日,就可能成為收藏家嘅搜羅對象。去年獲CORPHUB頒授最傑出女企業家獎嘅林麗娜(Lina),數年前因認識一位裁縫師傅,從而對衣車產生興趣,於是就從歐美等地搜集逾200部過百年歷史嘅古董衣車。

Lina收藏嘅古董衣車,全部都係純機械構造,同用摩打驅動、或電腦化嘅衣車相比雖顯得落伍,但就勝在毋須依靠電力,只要保存得好,即使跨越好多個世代仍可操作,絕對可以恒久流傳,況且古董衣車嘅機械布置得精確縝密,單係設計心思就令人嘆服。除機械構造,古董衣車嘅外觀細節亦頗堪玩味。Lina指衣車表面嘅花紋同線條,除咗反映當時嘅時髦美學,亦顯露不同地方嘅潮流風格,譬如美國衣車,表面紋飾較歐洲貨來得簡約;荷蘭與德國雖同屬歐洲國家,但前者嘅衣車紋飾則較後者華麗。雖然Lina收藏嘅古董衣車,多數都係透過私人出讓而得,不過運送嘅費用就仲高過購入價。儘管所費不貲,但Lina仍樂意將部分古董衣車,置於尖沙咀某商場展出,公眾觀賞之餘,亦可以用手去觸摸,以領略古董衣車機械結構之巧妙。

姚佑雄:對機械相機懷敬意

傑出青年協會前主席余嫿(Mary),以前家中都有國產嘅古董衣車,不過當佢移居香港,古董衣車就轉贈畀內地嘅親戚,時至今日仍然可如常操作。Mary指時下嘅衣車純粹講功能,反觀古董衣車嘅外形就具有一種美感,同老爺車一樣都受到收藏家嘅垂青。

同衣車相似,昔日嘅相機都係純機械操作。攝影藝術協會永遠名譽會長姚佑雄指廿多年前嘅菲林時代,攝影器材已邁向電子化,但佢會帶多一部純機械操作嘅相機出席各類拍攝場合。姚佑雄話機械相機可靠耐用,若有輕微故障佢都懂得自行維修。對資深攝影師而言,都會對機械相機懷有一份敬意,因此就算置身數碼時代,姚佑雄都收藏多部機械相機,連帶過百卷過期菲林,亦珍而重之。

卓妮

第一手消息請下載on.cc東網iPhone/iPad/Android/Windows Phone Apps