政情：區議員橫額寸懦夫 被指推動仇恨

破壞橫額情況未見收斂

呢幅涉事橫額，上方印有3張橫額被嚴重破壞嘅相片，下方則寫上「破壞橫額是懦夫」。任啟邦喺Facebook貼文話，佢同該區區議會主席關永業嘅橫額近月不斷被「懦夫無賴」破壞，所以佢哋以呢張橫額作回應。之但係，佢話「懦夫」唔單止冇收斂，更喺呢幅橫額寫上「吹咩」，批評對方係明目張膽。

任啟邦回應查詢時話，佢哋試過修補喺橫額上貼警告字句，但情況都未有改善。佢又話不論係關於民生項目，抑或係有關防疫嘅橫額都被(界刂)花，令佢哋難以進行地區服務及宣傳。佢仲話一共印製咗5條印上「破壞橫額是懦夫」嘅橫額，強調所掛嘅地方都係破壞橫額嘅「黑點」位置。

對於投訴人士指有關橫額煽動仇恨，佢反駁指有人賊喊捉賊，覺得好荒謬。至於橫額上印有其他區區議員的姓名，被質疑係以大埔區資源做宣傳，佢強調橫額設計係合乎相關規定。本報就此事已向民政事務總署查詢，惟截稿前未獲回覆。

大埔區議會秘書處（秘書處）回覆時話，喺2020年12月16日收到一宗有關區議員懸掛橫額嘅投訴。由於區議員於路旁展示嘅宣傳品須遵守地政總署發出嘅指引，因此秘書處喺收到該投訴後，已轉介大埔地政處作出調查同跟進，並已告知投訴人跟進情況。