中環出更：用乳酸飲品殺寄生蟲 林子龍獨創養魚新法
其實香港有唔少年輕人對農業同手工藝好有興趣，甚至自己創業同喺香港設立工場生產，究竟香港製造呢塊招牌有冇機會重新打進國際市場呢？林子龍（Alex）就以廠商身份參加咗一個本地企業嘅實習生計劃，本身係化妝師同形象設計師嘅佢，機緣巧合去玩滑浪，從此愛上大海，仲申請埋魚牌自己養魚添！
通常喺香港養魚都係家族生意，Alex話自己可能係全港第一個人咁樣中途入行。佢有向漁業前輩請教，但好多行家都選擇由內地直接買魚落嚟賣，甚少自幼養殖魚苗，加上養殖方法比較傳統，所以Alex覺得唔太適合。佢本身有養過狗、貓同蛇等其他寵物，但大規模養魚類真係第一次喇！佢發現魚苗有寄生蟲，會令到魚苗大量死亡，所以佢就用到佢多年養寵物嘅經驗，嘗試調製特別嘅飼料配方，例如用活性乳酸飲料、中藥同洋葱去浸泡飼料，幫啲魚殺蟲。雖然有進步，但Alex都好謙虛咁話仲係一路努力學習中。
Benny：全男班整護膚品
工業有動又有靜，香港蒸餾所總監Benny Au就係透過蒸餾技術製作護膚品。大眾通常會覺得整護膚品嘅男士都係好貪靚，但Benny自爆入行前冇乜用過護膚品，只係上一份工作識到一班大學化學系博士生，之後合作創業，團隊仲要係全男班嚟添。好多商家都會用動物試驗產品，但基於人道原因，加上動物試驗效果同人類嘅反應唔一樣。為求準確，本身唔護膚嘅Benny都親身上陣，將產品用喺身上，希望得到客人嘅信任。
活動場地贊助者、康迪斯數碼董事劉凱豪（Danny）話香港有其他優勢，例如港人英文好、學歷高、國際視野廣闊。Danny又覺得再工業化唔應該只得機械生產，更重要嘅係要有工藝，認為只要將一樣技術做精，都可以打「令」塊招牌。北區區議會主席、實習生計劃發言人羅庭德就話現時嘅年輕人多數畢業後都係打份工，好少嘗試務農或者學習工藝，所以佢想將手藝介紹畀年輕人，等佢哋知道有多一條出路，又可以重振香港製造嘅產業。
卓妮