中環出更：靳埭強做生意 鍾意同人拍住上
每個人做生意嘅方式都唔同，有啲人鍾意同朋友合夥，有啲就鍾意家族式經營，另外仲有啲覺得獨挑大樑都唔錯。唔知大家有機會創業會點揀呢？香港管理專業協會近排就搵咗班前輩分享經驗，睇吓佢哋點講。
本地著名設計師靳埭強話自己創業鍾意有拍檔，所以喺佢公司啱啱成立嘅時候，都係同一個同輩拍住上，覺得兩個人一齊做可以互補長短，而且出嚟嘅成品都好圓滿。之但係，同輩後來離開咗公司，靳再搵拍檔時，就決定搵後輩做合夥人，一齊將自己嘅經營理念傳承落去咁話。
靳好開心喺佢退休之後，嗰個後輩做出同佢一樣嘅選擇，搵咗自己嘅後輩做拍檔，既可以令年輕一輩有機會喺佢公司發展事業，又可以將靳嘅經營理念變成三代人嘅傳承，仲話呢件事喺佢嗰行嚟講，唔單止係非常傑出嘅案例，亦係令佢覺得值得驕傲嘅事。
至於香港中華總商會永遠榮譽會長方文雄就話世代嘅變化好大，依家嘅新世代用新科技去溝通同理解呢個世界，而方都理解年輕人有好多理想，可能會想好快就可以高薪厚職咁，但佢就覺得後生仔只要唔好太斤斤計較，專注做好自己嘅事就一定有回報o架喇！
鍾志平：中西合璧最有用
人稱「電鑽大王」嘅鍾志平話做咗咁多年生意，覺得中西合璧嘅管理方法就最有用。佢話中國人做生意偏向儒家思想、屬於家長式嘅管理，好處係行動力快好多；西方嘅管理傾向開放式，喺項目推出前可以廣納意見，令市場對產品嘅反應更好，所以鍾覺得兩者結合係最好嘅管理方式。卓妮