中環出更:北上創業碰壁 魏嘉俊冀官方設資訊平台

本港失業率不斷飆升,青年嘅失業率更高達7.6%,應屆大學畢業生可能一畢業就失業。政府近日鼓勵港青去內地就業創業,仲講到機遇處處咁,究竟係咪真係咁掂先?卓妮尋日去咗個香港青年內地發展調查發布會,見到前年起已分別去咗深圳同廣州發展嘅港青魏嘉俊(Wiva),聽佢講公司已完成研發階段,依家嘅目標係要積極拓展業務喎。

Wiva開發嘅產品其實係3D懸空影像系統,可以令投射嘅影像有視覺暫留嘅效果,零售商可以用立體旋轉影像嘅方式,去取代實物商品展示。原來Wiva最初揀深圳做落腳點,之後先發現當地市場要高新科技,而佢嘅產品技術就相對簡單,可以喺當地發展嘅空間唔大。之後再去文創氣氛較濃厚嘅廣州試吓發展,先知廣州先係佢發圍嘅地方。

作為過來人嘅Wiva覺得如果當初有官方嘅各個內地城市資訊交流平台畀佢做分析,咁就唔使嘥咁多時間去試邊個城市適合佢落腳喇!佢仲同卓妮講,有時做嘢做到攰,都會喺公司彈結他輕鬆吓、減吓壓咁話添!

黃宏達勉勵年輕人要面皮厚

至於將機械手畫山水畫、水墨畫動畫化等藝術科技技術擴展到內地嘅數碼特效製作公司行政總裁黃宏達,就話可能自己屋企本身做紙紮,所以都比較多創意諗法。佢仲勉勵依家嘅年輕人要面皮厚啲,唔好怕畀人拒絕,相信一定會有成功嘅一日,而佢自己咁多年嚟,好多機會就係靠自薦攞番嚟。

同場嘅香港廣東青年總會主席霍啟山話本港依家青年失業問題嚴重,認為港青可以試吓向「內」走,而佢亦建議政府可以擴充駐粵經濟貿易辦事處嘅功能,成為港青北上發展嘅切入點。副主席郭基煇就話今次調查發現港青最重視都係薪酬金額,至於工作與生活平衡,以及晉升機會,佢哋就覺得次要,至於政見理念反而排到第7位,原來相對唔太重要,係比較有趣嘅發現。

卓妮

第一手消息請下載on.cc東網iPhone/iPad/Android/Windows Phone Apps