政情：公民講場：電動巴士故障頻生 鄭美施咪死撐累人

為減少道路交通嘅廢氣排放，政府額外投放數億元於新能源運輸基金，以資助嘅形式嚟鼓勵運輸業試用電動車輛，而本港亦有幾間巴士公司引入內地廠商所生產嘅電動巴士以響應計劃。然而經過一段時間嘅測試，電動巴士嘅電池續航力不但遠低於試驗路線嘅營運需求，兼且故障頻生，導致相關嘅巴士公司要花費好多時間去處理故障及維修問題。儘管電動私家車漸趨普及，但用於商業營運嘅大型電動車輛，仲有唔少技術難關要克服。與其向業界推展技術遠未成熟嘅電動巴士，環境保護署署長鄭美施不如將資源用於其他環保項目仲好啦。