政情：陳梓維公墓直播捱批 與余德寶隔空駁火

事緣前晚有市民到太子站外就「太子831」事件獻花，一班油尖旺區議員尋日就將收集到嘅花束運到沙嶺公墓。陳梓維尋日喺社交平台發文，指自己由今年5月起，每個月都喺沙嶺公墓進行網上公祭直播，不過佢就收到同區嘅區議員意見，批評佢喺公墓進行直播有欠尊重，希望佢可以暫停。陳仲叫大家唔好問佢呢位同事係邊個，費事又畀人話分化。

區議會人事矛盾不斷

及後余德寶喺社交平台發文反擊，話對於有同事喺沙嶺公墓進行直播，而唔係幫忙將市民送上嘅白花放喺墓前嘅做法，感到難以理解，又暗指陳前晚突然甩底冇履行本來要做嘅工作！佢仲批評對方上任一年，依家咩場合都係直播當做咗件事，即使同事提醒都當作耳邊風，斥對方太自我中心。

有該區區議員就透露，陳梓維原本答應喺前晚做被捕支援，點知最後冇現身，且事前亦未有向佢哋交代去向。陳梓維回覆本報查詢時解釋，前日臨時收到街坊求助，而未有到太子站外做支援，佢又話因為太忙唔記得通知同事，承認係自己疏忽。區議會任期仲有3年，真係唔知仲有幾多地區人事矛盾會浮上面啊！