政情:安心出行成效差 薛永恒口窒講優化

政府早前推出流動應用程式「安心出行」,讓市民自願記錄行蹤,以便政府追查病源。議員麥美娟(Alice)尋日喺立法會資訊科技及廣播事務委員會上,話自己早前進入立法會嘅時候有掃描「安心出行」嘅二維碼,但最近佢踏足嘅處所就冇張貼二維碼。佢話如果根據「安心出行」嘅紀錄,佢「住咗」喺立法會幾日喇!

會議上,唔少議員話「安心出行」需要優化。其中,Alice批評「安心出行」只係到達處所嘅時候需要掃描,冇提示離開嘅時候亦需要操作,根本做唔到追蹤流行病嘅用途,促請局方盡快優化。Alice舉例話,自己早前到立法會嘅時候掃描咗大樓嘅「安心出行」二維碼,但離開立法會嘅時候,流動應用程式並冇發出任何提示,而咁啱呢幾日前往嘅處所又冇貼出二維碼喎,變相佢「住咗」喺立法會大樓成個禮拜。佢話離開特定處所嘅時候唔需要記錄,咁「安心出行」就冇乜用囉。

倡喺八達通安裝程式追蹤

唔單止咁,Alice話「安心出行」仲要係自願使用嘅,局方一來冇考慮強制性使用;二來又吸引唔到市民使用,就算特定處所提供二維碼,都要靠市民自覺。佢又批評「安心出行」落後,建議局方喺八達通上安裝程式,等市民使用嘅時候可以提供出行位置;又建議「安心出行」覆蓋率達到一定比例嘅時候,局方可否考慮放寬防疫措施,從而吸引市民下載使用呢?

答非所問 指有專「瓜」提醒

創新及科技局局長薛永恒回應話自己唔係流行病學專家。但唔知薛係咪太緊張,口窒窒咁話政府有專「瓜」提醒市民要記錄出行。面對薛嘅答非所問,Alice都有啲扯火,話其實問題好簡單,就係使唔使優化「安心出行」;使唔使強制使用呀?而薛唔知係聽唔清,定畀人鬧完反應唔切,話其實個程式應該提醒Alice已經離開咗,仲請大家多啲支持「安心出行」喎。

Alice結果都係忍唔住,喺薛未講完之前就搶住答,話「我真係收唔到喎!」面對Alice再三追問,薛先死死氣哋咁話,「會不斷優化、虛心學習」咋!

第一手消息請下載on.cc東網iPhone/iPad/Android/Windows Phone Apps