中環出更：徐英偉稱無迫害區會 籲議員勿政治化
自去年區選奪得大多數議席以來，由民主派主導嘅17區區議會同政府關係一直緊張。民政事務局局長徐英偉尋日出席電台節目時話，覺得有啲區議員唔係好有心同政府溝通，又指有人可能唔係好明白區議會嘅職能，做出一啲違法違規嘅越權行為，又叫區議員無謂太政治化，講到政府「迫害」區議會咁，要回歸理性喎。
18區民主派聯絡會議早前召開記者會，指本屆區議會上任至今，有逾160項討論議程被民政事務專員拒絕提供秘書支援，公職人員於會議期間離場亦達89次，涉及嘅議題包括過往區議會都獲准討論嘅政改、警方嘅地區行動同圖書館館藏等民生議題，令區議員推動工作時面對政府阻撓。
討論民生議題 被指雙重標準
面對有關嘅批評，徐英偉回應話只要符合區議會條例，當局樂意配合，不過有區議員作出違法違規嘅越權行為，甚至出現政府人員被侮辱同禁錮嘅情況，佢唔可能要求秘書處同事配合呢啲工作。佢又指部分地區性嘅文化活動，撥款都停滯不前，擔心會影響市民對區議會嘅信心。
南區區議員袁嘉蔚就打上電台節目反駁，指有時區議會只係討論監獄防疫，同虐待動物等嘅民生議題，都被視為違規，但以往由建制派主導嘅區議會都有討論過政治事件同全港性議題，但政府就無話佢哋違規，反問政府係咪雙重標準。
徐英偉解釋，政府就某啲重要議題主動諮詢區議會意見，並非違規，但區議會自行討論就唔符合規定喇，又話有啲議題涉及全港政策，有無違規都要問番相關政策局同埋法律意見喎。
卓妮