中環出更：梁天富怕中伏 向網購耍手
喺疫情影響下，市民外出消費意欲大減，加上唔少實體店倒閉，進一步強化網上購物嘅大趨勢。香港善德基金會副主席梁天富（Eddie）就話太太已經網上購物咗一段時間，不過都係買日用品為主，而自己就未能接受。究竟點解呢？原來係因為怕「中伏」買咗貨不對辦嘅貨品。
卓妮早排喺馬場撞見Eddie，佢話聽過好多朋友網購「中伏」嘅不快經歷，例如有朋友喺網上買咗價錢相宜嘅廁紙，點知到手之後開箱，發現個廁紙芯好大，而廁紙就好少。佢話網上購物將來會成為大趨勢，所以寄語營運網購嘅公司務必要貨真價實，消費者先至買得安心。佢仲話好多時購物都係一時衝動，如果喺實體店中睇啱邊件衫，就可以即刻試上身，呢樣都係有別於網上購物嘅體驗。
何艷桃幫襯聲譽好網店
香港教育工作者聯會會長黃均瑜同佢太太何艷桃，夫婦兩人都留意到內地嘅網購快速發展，連私家車都可以喺網上選購。不過對黃均瑜嚟講，多數只會利用手機應用程式叫外賣。至於黃太就話，夫婿工作繁忙「邊有時間上網買嘢」，其衣物同日用品主要係靠佢幫手購買。儘管網購嘅優勢係足不出戶就可買齊生活所需，不過黃太認為香港地方細，出街購物都好方便，加上佢非常重視產品嘅質素，希望親自到店內「摸吓、睇吓啲品質」，所以唔會喺網上購買手袋等較為貴價嘅產品。然而一般生活百貨，就會幫襯聲譽較好嘅網店。
中華廠商聯合會名譽會長顏吳餘英就話市道不景下，已經有幾個大牌子撤離香港市場，而佢今年見客同開會，亦多數改以視像會議形式進行，連帶自己亦少咗出街買衫。若果要網購的話，佢都會揀啲信譽較好嘅大牌子，起碼有品質保證嘛！
卓妮